Trefnu gwasanaeth amlosgiad
Y cyfarwyddwr angladdau yr ydych wedi’i benodi fydd yn trefnu gwasanaeth amlosgiad. Gallent archebu i ddechrau dros y ffôn, ond ni fydd hyn yn cael ei gadarnhau nes bydd y ffurflen gais gychwynnol am amlosgiad yn cael ei derbyn yn swyddfa'r amlosgfa. Rhaid i swyddfa'r amlosgfa dderbyn cyfarwyddiadau amlosgi cyn 10am ar y diwrnod gwaith cyn y gwasanaeth. Cyflwynwch unrhyw newidiadau yn ysgrifenedig ar y ffurflen wreiddiol, neu ni fyddwn yn gallu eu derbyn.
Rhaid i’n canolwr meddygol archwilio a chymeradwyo’r dystysgrif marwolaeth, y ffurflenni meddygol a’r ffurflenni cais am amlosgiad. Os yw’r ymgeisydd yn dymuno gweld y dystysgrif feddygol, dylid cyflwyno’r dogfennau erbyn 10am tri diwrnod gwaith cyn dyddiad y gwasanaeth.
Rhowch wybod i Reolwr y Gwasanaethau Profedigaeth a'r Cofrestrydd os yw'r person sydd wedi marw wedi marw oherwydd clefyd heintus. Mae rhestr ddiweddar o glefydau heintus ar gael gan y Gymdeithas Feddygol Brydeinig.
Cyswllt
Ffôn:
01656 656605
Cyfeiriad:
Llangrallo,
Pen-y-bont ar Ogwr,
CF35 6AB.
Amseroedd gwasanaeth
Mae gan yr Amlosgfa ddwy gapel, Capel Crallo a Chapel Coety. Mae Capel Crallo yn fwy gyda lle i 140 o bobl ac ystafell sefyll ychwanegol. Mae Capel Coety yn llai ac yn anenwadol. Mae lle ar gyfer 70 o bobl yno.
Gall gwasanaethau amlosgi ddigwydd:
- Dydd Llun i ddydd Iau: 9am tan 3.45pm
- Dydd Gwener: 9am tan 3.15pm
- Dydd Sadwrn: 9.30am tan 10.30am
- Dydd Sul a gwyliau cyhoeddus: ar gau
Mae’r gwasanaethau amlosgi’n para tua 30 munud, sy’n cynnwys 10 munud i’r galarwyr ddod i mewn a gadael, ac ugain munud ar gyfer y gwasanaeth. Os rydych yn meddwl y bydd angen mwy o amser arnoch, gofynnwch am hyn wrth archebu. Gallwn ehangu hyn i slotiau hanner awr.
Opsiynau gwasanaeth
Nid oes unrhyw ofynion penodol o ran y gwasanaeth amlosgi. Gall fod yn ffurfiol, yn anffurfiol, yn grefyddol neu’n anghrefyddol, ond cofiwch ni all fod yn dramgwyddus.
Mae croeso i deuluoedd ddarparu eu taflenni gwasanaeth eu hun y bydd y cyfarwyddwyr angladdau'n eu dosbarthu ger mynediad y capel.
Bydd gweinyddwr y gwasanaeth yn gyfrifol am weithredu switsh fydd yn dechrau gollwng neu orchuddio’r arch, yn unol â dewis y teulu. Pan fydd y galarwyr wedi gadael, bydd yr arch yn cael ei symud a’i roi yn y siambr amlosgi, yn union fel y’i derbyniwyd.
Bydd yr allanfa i'r cwrt blodau yn cael ei hagor ar ddiwedd y gwasanaeth. Dylai’r holl alarwyr adael drwy’r drysau hyn i osgoi tarfu ar y gwasanaeth canlynol. Mae’n rhaid i’r cyfarwyddwyr angladdau sicrhau bod galarwyr yn gadael erbyn diwedd y slot penodol fel y gall y gwasanaeth nesaf ddechrau'n brydlon.
Os yw grŵp yr angladd yn rhedeg yn ddigon hwyr i darfu ar wasanaethau eraill, efallai y bydd y gwasanaeth yn cael ei aildrefnu ar gyfer amser arall ar yr un diwrnod. Bydd hyn yn cael ei drafod â'r holl bartïon.
Nodwch unrhyw ofynion arbennig cyn diwrnod yr angladd, a byddwn yn falch o drafod y rhain gyda chi.
Cerddoriaeth ar gyfer gwasanaethau amlosgi
Gallwn ddarparu’r holl gerddoriaeth ar gyfer angladdau ar ein system cerddoriaeth capel ddigidol, yn cynnwys cerddoriaeth organ. Bydd angen i’r trefnydd angladdau wneud cais am gerddoriaeth o leiaf ddau ddiwrnod gwaith ymlaen llaw, gan gyflwyno’r ffurflen gais bwrpasol erbyn 10am ar y diwrnod gwaith cyn y gwasanaeth.
Rhaid i’r gerddoriaeth fod ar gael yn fasnachol, oherwydd bydd y trefnydd angladdau’n archebu’r gerddoriaeth trwy gyfrwng ein cyflenwr yn barod ar gyfer y gwasanaeth. Ni allwn dderbyn CDs, cofau bach USB ac ati, ac efallai y byddwn yn gwrthod chwarae’r gerddoriaeth os credwn ei bod yn amhriodol.
Os byddwch angen organydd, trafodwch hyn gyda’ch trefnydd angladdau fel rhan o drefniadau’r angladd. Yna, bydd y trefnydd angladdau’n llogi organydd ar eich cyfer.
Gallwn recordio a gweddarlledu gwasanaethau. Hefyd, gallwn ddarparu teyrngedau gweledol ar sgriniau’r capel. Os oes gennych ddiddordeb yn hyn, a wnewch chi ei drafod gyda’ch trefnydd angladdau, ac yna gall ei drefnu ar eich cyfer trwy gyfrwng ein cyflenwr a chadarnhau’r cais ar ffurflen gais bwrpasol yr Amlosgfa.
Cwrt blodau
Bydd y cwrt blodau a’r ardal gyfagos yn arddangos unrhyw flodau ger enw’r person sydd wedi marw. Gellid gosod plethdorchau, tuswau neu flodau ger y plac enw. Yn anffodus, nid oes digon o le i gadw’r rhain am gyfnodau hir, felly bydd y blodau'n cael eu tynnu oddi yno. Mae arwyddion yn y cwrt blodau fydd yn dweud wrthoch pryd y bydd hyn yn digwydd. Os ydych am ymweld neu dynnu rhai o’r teyrngedau yn ystod y cyfnod hwnnw, cysylltwch â'r Amlosgfa.
Ni ddylech dynnu teyrngedau o’r cwrt blodau a’u rhoi yn rhywle arall ar y tiroedd, gan gynnwys plotiau coffáu a’r ardd rosod. Bydd angen i ni dynnu’r rhain.