Proses ddatblygu seilwaith gwyrdd

Gall pob datblygiad gyfrannu at seilwaith gwyrdd drwy wella'r adnoddau presennol neu wella'r ddarpariaeth leol. Dylai graddfa a chost seilwaith gwyrdd adlewyrchu'r raddfa a'r math o ddatblygiad a gynigir. Gallai datblygiadau bach fel tai sengl gyfrannu gyda gerddi o faint digonol, bocsys nythu, neu doeau gwyrdd. Gallai cynlluniau tai dwysedd canolig i uchel gynnwys ardaloedd tyfu bwyd a mannau gwyrdd eraill ar gyfer gweithgareddau hamdden iach.

Lefel y seilwaith gwyrdd y dylech ei chynnig

Bydd lleoliad y datblygiad hefyd yn pennu faint o seilwaith gwyrdd y byddem yn ei ddisgwyl mewn datblygiad arfaethedig. Disgwylir i ddatblygiadau preswyl a datblygiadau mewn ardaloedd preswyl lle nad oes digon o fannau agored hygyrch ddarparu mwy na'r rheini mewn ardaloedd gwledig gyda seilwaith gwyrdd digonol.

Mae darpariaeth, cymeriad a dosbarthiad cyfleoedd seilwaith gwyrdd yn dibynnu ar:

• natur y lleoliad
• math o ddatblygiad
• y cyfraniad y gall wneud i eco-gysylltedd
• gwasanaethau rheoleiddio a darparu

Mapiau o seilwaith gwyrdd presennol

Ynghyd â Chyfoeth Naturiol Cymru (CNC), rydym wedi datblygu mapiau gwasanaethau ecosystem. Mae'r rhain yn dangos pa rai o ardaloedd y fwrdeistref sirol sydd â'r ddarpariaeth orau o ran rheoleiddio dŵr, cysylltedd cynefinoedd, cyfrannu at beillio neu ddarparu gweithgareddau hamdden. Gellir defnyddio'r mapiau i nodi’r ffordd orau y gall eich datblygiad ddefnyddio a chyfrannu at ba mor ymarferol yw seilwaith gwyrdd.

Rydym yn disgwyl i gynigion datblygu helpu i fynd i'r afael â materion cymdeithasol, amgylcheddol ac economaidd y fwrdeistref sirol.

Sut i fynd i’r afael â materion lleol

1. Edrychwch ar y Cynllun Datblygu Lleol i benderfynu pa faterion allai fod yn arbennig o berthnasol i leoliad eich datblygiad arfaethedig.
2. Dysgwch sut y gall asedau seilwaith gwyrdd helpu i fynd i'r afael â'r materion hyn.
3. Adolygu a diwygio eich ‘map cyd-destun’ gyda'r materion lleol a'r math o ddatblygiad y bwriedir iddo nodi pa faterion y gellir mynd i'r afael â nhw drwy seilwaith gwyrdd.

E-bostiwch planning@bridgend.gov.uk am fwy o gyngor.

Waeth pa mor fach, gall pob newid i gartrefi neu amgylcheddau gyfrannu at seilwaith gwyrdd drwy wella'r adnoddau presennol. Gall cynlluniau bach fel datblygiadau tai sengl gyfrannu drwy ddarparu gardd o faint digonol, blychau nythu ar gyfer adar ac ystlumod, neu do gwyrdd. Dylai graddfa a chost seilwaith gwyrdd a gyflawnir adlewyrchu'r raddfa a'r math o ddatblygiad a gynigir.

Un cam cyntaf hanfodol cyn cynllunio unrhyw newidiadau yw arolwg syml o'r safle i weld pa nodweddion seilwaith gwyrdd sy'n bresennol ar y safle ac o'i amgylch. Nodwch hefyd pa mor bwysig ydynt, a sut y gellir cadw neu wella nodweddion arwyddocaol yn y cynnig. Bydd y cam hwn hefyd yn helpu i benderfynu a oes angen arolygon manwl neu gymorth arbenigol.

Sylwch ar yr astudiaethau achos sy'n dangos yr arferion gorau o dan ‘Dogfennau’ ar y dudalen hon.

Am fwy o gyngor, e-bostiwch planning@bridgend.gov.uk.

Cam cynnar hanfodol unrhyw gynnig datblygu yw cwblhau arolwg safle ac astudiaeth ddesg. Dylai’r rhain bennu’r canlynol:

• pa nodweddion seilwaith gwyrdd sy'n bresennol ar y safle ac o'i gwmpas
• pa mor bwysig ydynt
• sut y gellir cadw neu wella nodweddion arwyddocaol wrth ddatblygu

Bydd y cam hwn hefyd yn helpu wrth benderfynu ar gwmpas unrhyw arolygon pellach y gallai fod eu hangen, fel y canlynol:

• Cyfnod Estynedig i Arolwg Cynefinoedd
• Arolwg o Rywogaethau a Warchodir
• Arolwg Coed
• Arfarniadau Nodweddion Tirwedd ac Effaith Weledol

Os oes Ardal Cadwraeth Arbennig yn y parth dylanwad, efallai y bydd angen asesiad ar wahân o dan Reoliadau Cynefinoedd 1994.

Am fwy o gyngor, e-bostiwch planning@bridgend.gov.uk.

Unwaith y bydd y nodweddion seilwaith gwyrdd ar y safle ac o'i amgylch wedi’u nodi a'u gwerth wedi'i ystyried, dylid eu mapio. Dylai'r ‘map cyd-destun’ hwn weithredu fel fframwaith neu ‘brint gwyrdd’ y gellir cynllunio'r datblygiad yn unol ag ef. Mae'n caniatáu dylunio mewn ffordd sy'n gwneud y defnydd gorau o asedau'r safle, yn cynyddu eu buddiannau i'r eithaf ac yn sicrhau cydymffurfiaeth â deddfwriaeth a pholisi. Gweler enghreifftiau o'r nodweddion seilwaith gwyrdd y dylid eu nodi ar y ‘map cyd-destun’.

Efallai y bydd ystyried asedau safle a chynllunio gofalus yn cael gwared ar yr angen am ofyniad am arolygon a mesurau lliniaru ychwanegol yn ddiweddarach yn y broses gynllunio. Darparu lluniadau, manylebau a datganiadau dull ar gyfer cysyniad dylunio cyffredinol, tirlunio meddal a chaled, draeniad tir, dyraniadau defnydd arfaethedig, cyflwyno datblygiadau yn raddol, ac yn y blaen.

At ddibenion rheoli datblygu, dylai cynllun arolwg safle gynnwys:

• dyddiad yr arolwg
• mesuriadau'r safle, wedi’u graddio'n addas ar gyfer plotio hyd at 1:200
• lleoliad y ffin a sut fath o ffin yw hi - ffens, wal, gwrych, a ddylai gynnwys tir y bwriedir ei ddatblygu a thir arall cyfagos sydd dan reolaeth y perchennog neu'r ymgeisydd
• lefel y ddaear ar ffiniau ac ar draws y safle ar batrwm grid, yn ogystal ag ar waelod nodweddion fel coed, cylfat/gwaelodion mewnol twll caead gyda chyfuchlineddau
• defnydd presennol y tir, gan gynnwys tir cyfagos perthnasol
• cyrsiau dŵr a chyrff dŵr, gan gynnwys afonydd, nentydd, ffosydd a phyllau, hyd yn oed os ydynt yn sych ar adeg yr arolwg
• nodweddion daearegol neu geomorffolegol fel amlygiadau creigiau
• adeiladau a strwythurau presennol
• gwasanaethau cyfleustodau presennol amlwg uwchben ac o dan ddaear - dail, a thystiolaeth o wasanaethau blaenorol neu rai dan ddaear fel tyllau caead, polion lamp, blychau cyswllt
• gatiau, mynedfeydd, ffyrdd, llwybrau, llwybrau ceffylau a llwybrau beiciau, a hefyd unrhyw rwystrau
• ffiniau bras o fathau mawr o lystyfiant fel coed, glaswelltir, prysgwydd, rhos, llwyni addurnol, ac ardaloedd o dir moel neu dir caled
• pob coeden unigol a grŵp o goed gyda diamedr bonyn yn mesur mwy na 7.5cm ac 1.5m uwchben y ddaear
• coetiroedd gydag amlinell yn dangos ymyl y canopi allanol, a boncyffion coed ymyl allanol wedi'u plotio'n unigol ar hyd pob ochr yn y safle neu’n ei wynebu
• darnau sylweddol o goed bach, coed newydd eu plannu a llwyni addurnol a ddangosir fel grwpiau fel arfer
• rhywogaethau ymledol fel clymog Japan neu'r efwr enfawr, os yn bosibl
• dyfyniadau o luniau diweddar o’r awyr a mapiau Arolwg Ordnans hanesyddol pan mae hawlfraint yn caniatáu a all ddangos defnyddiau blaenorol y tir a all ysgogi cynigion tirweddau creadigol

Am fwy o gyngor, e-bostiwch planning@bridgend.gov.uk.

Dylai nodweddion seilwaith gwyrdd sydd wedi'u mapio a materion lleol penodol fod yn sail i’r broses o ddylunio’r datblygiad. Dylid dylunio seilwaith gwyrdd mewn ffordd integredig, ochr yn ochr ag elfennau adeiledig y cynnig. Fe ddylai sicrhau'r canlynol:

• cysylltiad ecolegol â'r rhwydwaith seilwaith gwyrdd o’i amgylch
• bod yn gymharol i raddfa'r cynnig
• cynnwys cysylltiadau i alluogi trafnidiaeth gynaliadwy o amgylch y safle neu drwyddo, lle bo'n briodol

Mae rhagor o ganllawiau i'w cael yn y:

• Cynllun Datblygu Lleol
• Canllawiau Cynllunio Atodol Mannau Agored a Hamdden
• Strategaeth Cerdded a Beicio (Trafnidiaeth Gynaliadwy)
• Canllawiau Dylunio Tirweddau
• Taflenni Canllawiau Dylunio Bioamrywiaeth

Pan fydd yn amhosibl cyflawni’r nodweddion a’r swyddogaethau priodol ar y safle, dylid tynnu sylw at hyn fel mater i'w drafod gyda'r Cyngor. Yn yr achosion hyn, efallai y byddwn yn awgrymu prosesau lliniaru neu gyfrannu oddi ar y safle at nodweddion seilwaith gwyrdd cyfagos.

Ystyriwch yr astudiaethau achos o dan ‘Dogfennau’ sy'n dangos arfer gorau.

Am fwy o gyngor, e-bostiwch planning@bridgend.gov.uk.

Ar ôl gofyn am gyngor a llenwi arolwg syml o'r safle, gwnewch yn siŵr bod eich cais cynllunio yn cynnwys manylion sut y byddwch yn creu neu'n gwella nodweddion seilwaith gwyrdd.

Am fwy o gyngor, e-bostiwch planning@bridgend.gov.uk.

Cyflwyno ceisiadau am ddatblygiad mawr neu sensitif

Bydd disgwyl i bob datblygiad mawr neu sensitif roi ystyriaeth fanwl i effaith ei gynnig ar y rhwydwaith seilwaith gwyrdd. Gwnewch yn siŵr bod eich cais cynllunio yn mynd i'r afael â gofynion seilwaith gwyrdd.

Dylid rhoi ystyriaeth benodol i’r pynciau canlynol sydd wedi’u nodi yng Nghynllun Datblygu Lleol Pen-y-bont ar Ogwr:

Bioamrywiaeth a chadwraeth natur

• Polisi SP2
• Polisi SP4
• Polisi ENV4
• Polisi ENV6

Newid hinsawdd

• Polisi PLA4
• SPG12: Ynni cynaliadwy

Seilwaith gwyrdd

• Polisi ENV5

Tirwedd

• Polisi SP2
• Polisi SP4
• Polisi ENV3

Diogelu adnoddau naturiol ac iechyd y cyhoedd

• Polisi ENV7

Mannau agored a hamdden

• Polisi COM11
• Polisi COM12
• Polisi COM13
• Canllawiau Cynllunio Atodol ar gyfer darparu chwaraeon awyr agored, mannau chwarae a mannau agored cyhoeddus

Tirweddau cynhyrchiol

• Polisi COM14

Cludiant

• Polisi PLA7

Am fwy o gyngor, cysylltwch â planning@bridgend.gov.uk.

Os bydd eich cais cynllunio yn llwyddiannus, mae'n bosibl y byddwn yn pennu rhwymedigaethau cynllunio i gytuno ar yr union gyfraniadau at seilwaith gwyrdd. Hefyd, bydd y rhain yn sicrhau mai prin iawn yw'r aflonyddu ar nodweddion seilwaith gwyrdd yn ystod y cyfnod adeiladu.

E-bostiwch planning@bridgend.gov.uk am fwy o gyngor.

Mae'n bwysig bod y gwaith o reoli nodweddion seilwaith gwyrdd yn y tymor hir mewn datblygiadau mawr yn cael ei nodi mewn Cynllun Rheoli Tirwedd. Mae ariannu'r gwaith o ddarparu seilwaith gwyrdd a'i gynnal yn barhaus yn fater pwysig y mae angen ei drafod gyda ni yn ystod y broses gynllunio.

Am fwy o gyngor, e-bostiwch planning@bridgend.gov.uk.