Y Cyngor yn lansio ymgyrch i dynnu sylw at y rhai sydd wedi ennill gwobrau bwyd y byd yng nghanol tref Pen-y-bont ar Ogwr

Mae ffilm fer newydd sy’n arddangos y dewis eang o fwytai ‘cyrchfan’ sydd wedi’u lleoli yng nghanol tref Pen-y-bont ar Ogwr wedi’i rhyddhau fel rhan o ymgyrch ‘Treulio’r Haf yng nghanol eich tref’ y cyngor.

Yn cynnwys lluniau o staff a chwsmeriaid yn y naw bwyty lleol gan gynnwys Zia Nina, Poco Poco, Franco’s Ristorante Vecchio, La Cocina, Tholos, Il Colosseo, Marble Steakhouse, Corvo Lounge a Morgan’s Bistro and Cocktail Bar, mae’r ffilm yn arddangos economi noson lewyrchus y dref ac yn tynnu sylw at y bwyd o ansawdd uchel ac amrywiol sydd ar gael yn y mannau coginio poblogaidd hyn, sy’n denu llu o ymwelwyr i’r ardal.

Mae canol y dref hefyd yn gadarn ar y map fel cartref i’r ‘Bwyty Gorau yng Nghymru 2023’ yn dilyn Morgan’s Bistro and Cocktail Bar yn cipio’r wobr fawreddog yng Ngwobrau Busnes Gorau Cymru 2023 yn gynharach eleni. Cafodd y Bistro hefyd ei enwi’n Fistro De/Gorllewin y flwyddyn’ yng Ngwobrau Bwyd Cymru 2023 yr wythnos hon.

I weld y fideo, ac i gael rhagor o fanylion am ‘fwytai cyrchfan’ yn y fwrdeistref sirol, ewch i wefan y cyngor.

Gall pobl sy’n ymweld â chanol tref Pen-y-bont ar Ogwr ar ôl 6pm barcio am ddim yn y maes parcio awyr agored mawr yn Stryd Bracla (y tu ôl i Wilkinson’s) a’r meysydd parcio yn Heol Tremains, Heol Tondu ac yng Nghanolfan Bywyd Pen-y-bont ar Ogwr. Mae rhagor o wybodaeth am barcio yng nghanol y dref hefyd ar gael ar wefan y cyngor.

“Mae’r busnesau llewyrchus hyn wedi rhoi hwb i’r economi leol ym Mhen-y-bont ar Ogwr, ac rwy’n falch iawn bod y dref, o ganlyniad, yn prysur ennill enw da fel ‘cyrchfan’ am ei brydau byd-eang rhagorol. “Mae cael naw bwyty ‘cyrchfan’ llwyddiannus mewn dim ond un dref fechan yn rhyfeddol, a gweld y busnesau hyn yn gweithredu o adeiladau sydd wedi’u hadfywio fel rhan o gynlluniau adnewyddu fel y Fenter Treftadaeth Treflun a grantiau Trawsnewid Trefi – a oedd yn cynnwys cyllid o’r grant mae Llywodraeth Cymru wedi’i sicrhau gan y cyngor ar gyfer gwaith adnewyddu allanol a mewnol i’r adeiladau sy’n gartref i La Cocina, Marble Steakhouse, a Zia Nina, yn ganlyniad gwych i’r economi leol a’r gymuned ehangach. “Mae’r gwir yn y gacen, a byddwn i’n annog unrhyw un sydd heb flasu dim o’r bwydydd blasus sydd gan y bwytai gwych hyn i’w gynnig, ar stepen ein drws, i ymweld â nhw. Ni chewch eich siomi!”

Aelod Cabinet dros Dai, Cynllunio ac Adfywio, y Cynghorydd Rhys Goode: