Gwnewch y Nadolig yn amser hapusach drwy gyfrannu at Apêl Sion Corn

Rydym yn gofyn i bobl ar hyd a lled Cyngor Bwrdeistref Sirol Pen-y-bont ar Ogwr a wnan nhw helpu i ddod â gwên i blentyn neu berson ifanc bregus y Nadolig hwn drwy gyfrannu at Apêl Sion Corn eleni.

Unwaith eto, mae ein hadran Gwasanaethau Cymdeithasol a Llesiant yn cefnogi’r apêl flynyddol am deganau ac anrhegion i’r rhai na fyddai o bosib yn cael anrheg i’w hagor ar fore Nadolig fel arall.

Mae rhoddion arian yn ddelfrydol er mwyn prynu anrhegion sy’n addas i blant a phobl ifanc o'u geni hyd at 21 mlwydd oed.

Mae gwneud cyfraniad yn hawdd, gallwch roi ar-lein ar dudalen Just Giving pAwen neu gall ein partneriaid mewn canolfannau Hamdden a phyllau nofio Halo hefyd dderbyn cyfraniadau ariannol a chyda cerdyn ar eu tiliau.

Os byddai'n well gennych chi roi cyfraniad o anrheg, tybed a wnewch chi fynd â'ch anrheg newydd, heb ei lapio, mewn bag rhodd i'r pwyntiau gollwng dynodedig canlynol rhwng dydd Llun 18 Tachwedd a dydd Gwener 29 Tachwedd 2024:

• Cyngor Bwrdeistref Sirol Pen-y-bont ar Ogwr, Swyddfeydd Dinesig, Stryd yr Angel, Pen-y-bont ar Ogwr
• Llyfrgell y Pîl
• Llyfrgell Porthcawl
• Canolfan Chwaraeon Maesteg
• Canolfan Fywyd Cwm Garw

Mae oriau agor y llyfrgelloedd ar gael ar wefan Awen.

Bydd gwirfoddolwyr yn mynd ati eto i ddidoli’r anrhegion yn ôl grwpiau oed priodol a’u lapio’n barod i’w danfon i gartrefi plant a phobl ifanc ledled y fwrdeistref sirol.

Bydd tudalen Just Giving ar gyfer Apêl Sion Corn yn cau ddydd Gwener 13 Rhagfyr 2024.

Er y bydd nifer ohonom yn dechrau bod yn gyffrous ar gyfer tymor y Nadolig, i lawer o deuluoedd gall y Nadolig fod yn amser sy'n achosi straen a gor-bryder ac yn amser trist, gyda chostau byw sy'n cynyddu a'r caledi ariannol mae pobl yn ei wynebu, mae yna gyfran fawr o deuluoedd yn ein cyngor bwrdeistref sydd angen ein cefnogaeth y gaeaf hwn.

Mae ein Hapêl Sion Corn yn dod ag ychydig o gysur a llawenydd i blant a phobl ifanc led-led y fwrdeistref sirol a fyddai, heb ein cymorth ni, heb unrhyw beth ar Ddiwrnod Nadolig. Mae ein timau gwych o fewn y gwasanaethau cyhoeddus yn gweithio gyda'n partneriaid yn Ymddiriedolaeth Ddiwylliannol Awen a Hamdden Halo, unwaith eto, er mwyn eich annog chi i gyfrannu at ein Hapêl Sion Corn ar gyfer 2024

Os ydych chi'n gallu rhoi cyfraniad bychan neu ychwanegu rhodd ychwanegol at eich rhestr siopa eleni, a wnewch chi ystyried rhoi er mwyn gwneud y Nadolig yn amser hapusach i blant lleol.

Dirprwy Arweinydd a'r Aelod Cabinet dros Wasanaethau Cymdeithasol ac Iechyd, y Cynghorydd Jane Gebbie