Cynllun Corfforaethol

Mae ein Cynllun Corfforaethol ar gyfer 2023-28 yn nodi blaenoriaethau’r cyngor a sut fyddwn yn gweithio ochr yn ochr â phobl a phartneriaid lleol i gyflwyno gwasanaethau dros y pum mlynedd nesaf.

Mae’r cynllun, ‘Cyflawni gyda’n Gilydd’, wedi’i ddylunio i fod yn haws i bobl ymgysylltu ag ef.

Mae wedi’i gynhyrchu gan ddefnyddio adborth gan staff, trigolion o bob oed a chefndir, defnyddwyr a darparwyr gwasanaethau’r cyngor, aelodau etholedig, sefydliadau partner, awdurdodau lleol eraill, a mwy.

Mae Bwrdeistref Sirol Pen-y-bont ar Ogwr yn cwmpasu tua 100 milltir sgwâr gyda phoblogaeth o 145,760 (Data o gyfrifiad 2021).

Mae ein daearyddiaeth yn amrywiol, gyda chymoedd hardd yn y gogledd a 12.5 milltir o arfordir a thraethau yn y de.

Mae’r M4 yn rhedeg drwy ganol y Fwrdeistref Sirol, ac mae gennym gysylltiadau rheilffordd prif linell reilffordd i Gaerdydd a Llundain i’r dwyrain, ac i Abertawe yn y gorllewin.

Mae ein hasedau yn ein helpu i gadw ein cymunedau wedi’u cysylltu a’u cefnogi. Heb ein tir, ein hadeiladau a’n ffyrdd a llwybrau troed, ni fyddem yn gallu darparu’r rhan fwyaf o’n gwasanaethau.

Rydym yn cynnal 882 cilometr o rwydwaith ffyrdd a 613.72 cilometr o hawliau tramwycyhoeddus hefyd, sy’n cynnwys llwybrau troed. Mae hyn yn bellach na’r pellter o Ben-y-bont ar Ogwr i John O’Groats!

Ein huchelgais ar gyfer Bwrdeistref Sirol Pen-y-bont ar Ogwr

Dros y pum mlynedd nesaf, rydym am fuddsoddi yn y pethau cywir, y pethau sy’n gwneud y gwahaniaeth mwyaf ac sy’n cael eu gwerthfawrogi fwyaf gennych chi.

Pum ffordd o weithio eich Cyngor chi:

• Defnyddio adnoddau’n well ac yn eu targedu’n well
• Un Cyngor, yn gweithio gyda’n gilydd a chyda phartneriaid
• Gwella cyfathrebu, ymgysylltu ac ymatebolrwydd
• Cefnogi a grymuso cymunedau
• Gwarchod y gwasanaethau sydd bwysicaf i chi